Be cool

Toi pensando si poné-y a esti blog "reflexones sobre la llingua" porque doime cunta que ye lo que vengo faciendo dende qu'entamó. El casu ye que nun fai muncho diome por pensar que la llingua taba ya más o menos normalizada. Nun me malinterpretéis. Digo que ta normalizada porque namái son 3 o 4 mazcayos los que ven el falar n'asturianu como "de paletos" y tal. Ye más, pa muncha xente, agora ye daqué guai, "cool". Presta-ys salir d'Asturies y que-ys sientan dicir "ye" y "ho" y otres pallabres. Vamos, que ye "prestoso". Pero nesti puntu ye onde yo me faigo la mesma pregunta de tolos díes. ¿Saben falar castellán bien? Igual non. ¿Saben falar n'asturianu bien? Igual tampoco. Ye lo que tienen les medies tintes estes d'enseñar l'asturianu optativu, ensin que seya llingua vehicular y tol percal, que nin nosotros somos quien a separtar una llingua de la otra, y bien claro ta, los neños tampoco. Envede enseñanos les dos llingües bien (como en tolos sitios onde se mira polos idiomas) pa que tengamos el privilexu y la suerte de ser BILLINGÜES, déxenlu a mediu camín y asina nos va. Nin la una nin la otra. Siguimos con esta xíriga d'amestáu que (por otra parte fáiseme necesarísimo remarcar) tol mundu l'acepta pero que tien un filu doble y ye que avezámonos, o avézannos, a falalo y a la fin nun tamos arraigaos nin al castellán nin al asturianu.

Enfin, ye lo que pasa cuando se tien una clas política tan mediocre y tan irresponsable nes instituciones autonómiques.

Llévalas el vientu..

Hai delles situaciones na vida, delles decisiones que tomamos, nes que naide nos puede asegurar que tamos faciendo lo correutu. Ye más, nunca vamos saber si estes situaciones y decisiones foron bones o males porque nun vamos vivir nin una, nin dos, nin tres vides pa comprobalo. ¿Qué vertigo verdá? Tamos amarraos a un ancla mui fonda que se llama conciencia y que, les veces que furrula, puede llegar a consuminos ensiguida. Ye bien fuerte pero ye asina.

Agora imaxinái qu'aparte d'estos problemes personales tenemos tamién la responsabilidá de tomar les decisiones qu'incumben o rixen la vida d'un montón de xente. Esto ya supondría una carga en munchos casos demencial, ¿non?. Dalgunes persones nin siquiera pensaríen asumir tal goxáu de responsabilidá. Pero el casu ye qu'hai xente a la que nun-y tiembla la manu pa xulgar, imponer y decidir lleis, programes y decretos que dexuru nel futuru (igual non mui llonxanu) van tener consecuencies irreversibles. FALO concretamente de los gobernantes asturianos, que se creen col drechu y la potestá d'acabar con una llingua que tien más de mil años cuando ellos nun son, nin serán más qu'un borronín rácanu nesa llinia tan llarga que nomamos historia. Podían ser recordaos por ser los salvadores de la mesma, o por ser los impulsores d'una recuperación qu'habría reconocése-ys nos llibros de l'avenir pero deciden la muerte. Deciden la muerte pudiendo apostar pola vida. Créense capaces de decidir l'asesinatu d'una llingua y asúmenlu arguyosos y gallasperos. Pero vamos ver, ¿Nun sé dan cunta que ye un tema que los sobrepasa? ¿Nun sé dan cunta que la cultura, UNA LLINGUA, ye un tema que trasciende la so vida, y que nun pueden faer más que defendela y lluchar pola so conservación? ¿De verdá se creen tan importantes y de tal altor como pa tomar eses decisiones qu'incumben a tola idiosincrasia, a tola cultura, y a tola historia d'Asturies? Yo creo que non. Yo creo que nun son conscientes de lo que fain. El tiempu pon a caún nel so llugar pero pol bien de tolos asturianos, y polo que nos toca, pol bien de tola humanidá, esperemos que daquella podamos entendenos nesta llingua na que me dio por escribir, porque de nun ser asina, seremos responsables d'una perda qu'habrá remembrase a lo llargo la historia.

Un día tarde

La vida non vivida ye una enfermedá de la que se puede morrer. La tierra mal cuidada ye una opción que puede matanos. Verde.

Asignatura Pendiente

Nun fai muncho sentí que l'asignatura pendiente del asturianu yera la so narrativa. Ye verdá. Podemos sentinos arguyosos de la Poesía que tenemos y podemos dicilo bien alto, ensin embargo nun podemos falar igual de la narrativa. Nun hai grandes noveles, nin grandes referentes como los hai y los hubo n'otres dómines na lírica, pero lo que sí hai ye un mayor grupu de xente que tien coses que tresmitinos cuntando y que de xuru nun van tardar en recoyer los frutos. Estos frutos, dellos meyores y otros menos buenos, podrán puxar un pocoñin la reconocencia d'esta llingua, y facer asina que la xente respete eses pincelaes milenaries que se-ys escapen a cada poco pelos llabios. Hai paradóxicamente cada vez más materia prima, y cada vez más concencia d'idioma. A ver si asina-y damos la vuelta a la regla de tres y surden más falantes ensin complexos, y esti verde d'alredor representa, por una vez, la esperanza.

Humanos

Voi compartir con vosotros una reflexón que tuvi la suerte d'alcontrar y que tengo'l privilexu de traducir y espublizar. Espero que vos preste tanto como me prestó a min, anque la verdá que igual gana más escrito na llingua orixinal, el castellán.

HUMANOS

"¿Y nosotros facémonos llamar humanos? ¿Porqué? ¡Ah si ho! Por esi muérganu que llamamos celebru que ye’l que nos da la capacidá de pensar. Vamos ver, un lleón por exemplu, ¿seguiría siendo’l rei de la selva si nun emplegara la so fuerza pa lluchar? Non. Entós, ¿cómo quies sentite humano ensin emplegar un res la tiesta pa pensar?
La humanidá miedra, aumenta’l desarrollu tecnolóxicu pero, paradóxicamente disminúi l’usu de les capacidaes humanes más interesantes.
Toos estos avances que vienen daos pola evolución persiguen un oxetivu común: simplificar.
Simplifiquen la vida hasta tal puntu que nun necesitamos pensar. Movémonos como máquines ya planificaes, cola mente en negro, puerca de sensaciones falses y deterioraes.
Calculadoras pa nun calcular, e-mails pan un escribir cartes, pastilles pa nun comer, comíes pa nun cocinar, cintes pa correr ensin movese, fotos pa nun tener que molestase en recordar, teles, películes, videoconsoles, ordenadores, que nos chupen la sangre como cachiparros, faciendo que la mayor preocupación seya la ropa que vas poner o cómo quedó’l partíu d’ayeri.
¿Sentísvos tovía superiores a cualquier otru animal? Nun lo sois. Ellos saben daqué que nosotros nun sabemos. Saben buscar un sitiu frescu, afayadizu y solitariu, con unes vistes guapes nes que se pueda percibir de qué color ye’l silenciu, cómo sona una flor, lo seliquín d’una gota d’agua, o el sabor d’un xiblíu de vientu. Ellos disfruten de les maravíes que nos da la naturaleza, perciben más sensaciones que toos vosotros na vida sentaos delantre d’un cuadráu brillante, arrodiaos d’ondes invisibles que tracamundien tol entornu. Sabéislo, causámoslo. Esti diañu treslúcidu activa les célules, nuestro yo más pequeñu, provocando colos años esa gran y temida enfermedá.
Nun sois más que nada. Nun yes más que nada.
¿Cuándo foi la última vez que visti un atapecer? ¿Qué lleisti un llibru que te tresportó a un mundu paralelu? ¿Que t’emocionasti con un xestu inesistente o que te descubristi sonriendo ensin saber porqué?
Piénsalo, un segundu, respira… ¿nótaslo? Eso ye ser humano."

Por P. A. Sieiro (nkp)

Llionés nes escueles

Acabo lleer que pal añu que vien, na provincia de Lleón, va ufiertase la posibilidá d'estudiar "llionés" como asignatura optativa nes escueles. Cuala foi la mio sorpresa cuando lleí qu'esta propuesta foi sofitada pol PSOE reconociendo que ye una llingua en seriu peligru d'estinción y que polo tanto hai que da-y puxu. Parez de llocos cuando dellos kilómetros más p'arriba el mesmo partíu ta a acabar con ella pero bono, de too tien qu'haber nos dominios del Señor... o eso dicía mio güela.

Lo gafo ye que nun acaba ehí sinon que dixeron qu'esto yera namái l'entamu, que nun se podía dir de la ná al too, pero que la idea yera que nún futuru la llingua tuviera normalizada y fora accesible a tola sociedá. Como siempre Asturies queda patrás. Suerte nesti viaxe vecinos lleoneses. A ver si se-ys pega daqué a los vuestros socios norteños de partíu.

Daqué nun funciona bien

Daqué nun funciona bien cuando solo tas viviendo de remembrar dellos bonos momentos. Sintiéralo nun fai muncho nuna canción d'un grupu d'Euskadi, y la profundidá d'estes pallabres tovía me dexa plasmáu. Nun se puede vivir tol día pendiente de lo bono que foi'l pasáu, de lo desastrosu que ye'l mundu güei y de lo fantástico que sería volver a como yera too cuando nun medíemos más de metru y mediu. Hai que tener cuidáu con esto. Ye una murnia que munches veces nun nos dexa vivir pero otres munches, y en compaxinándola con nuevos proyectos, puede da-y a la vida un sabor perdulce.

Digo, nun se trata de vivir ancláu nel pasáu sinon de garrar l'ancla de lo pretérito y echase a la mar del futuru en busca de un horizonte. Un horizonte qu'atoparemos si miramos bien dientro de nós.

Nun desesperéis, nun ye fácil dar con él, pero si a la vera tenéis una lluz que vos guíe col corazón, de xuru qu'en navegando un tiempu alcontraréis esi horizonte del que vos falaba.